លទ្ធផលតេស្តបង្ហាញថា ជនជាតិហុងគ្រីដែលរត់ចេញពីចត្តាឡីស័កនៅសៀមរាប

លទ្ធផលធ្វើតេស្តពីវិទ្យាស្ថានប៉ាស្ទ័រកម្ពុជា បានបង្ហាញថា បុរសជនជាតិហុងគ្រី ដែលរត់គេចចេញពីចត្តាឡីស័កមួយកន្លែងនៅក្នុងខេត្តសៀមរាម «មានផ្ទុកកូវីដ-១៩»។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជា។

ក្រោយពីទទួលបានលទ្ធផលតេស្តនេះ ក្រុមការងារឆ្លើយតបបន្ទាន់នៃមន្ទីរសុខាភិបាលខេត្តសៀមរាប នាយកដ្ឋានប្រយុទ្ធនឹងជំងឺឆ្លងរបស់ក្រសួងសុខាភិបាល សហការជាមួយនិងអង្គការសុខភាពពិភពលោក និង មជ្ឈមណ្ឌលគ្រប់គ្រងជំងឺឆ្លងរបស់សហរដ្ឋអាមេរិក កំពុងបន្តស្រាវជ្រាវរកអ្នកប៉ះពាល់ជាបន្តទៀត ហើយនឹងបន្តជូនដំណឹងដល់សាធារណជននូវការវិវត្ត ឬហេតុការណ៍មិនប្រក្រតីណាមួយ។

គួរបញ្ជាក់ថា បុរសជនជាតិហុងគ្រីដែលផ្ទុកវីរុសកូវីដ-១៩ មានអាយុ ៧០ឆ្នាំ ជាអ្នកដំណើរពីប្រទេសបារាំង បានបន្តជើងហោះហើរតាមប្រទេសកូរ៉េខាងត្បូង និងមកដល់កម្ពុជានៅថ្ងៃទី១៣ ខែកញ្ញា ឆ្នាំ២០២០, លទ្ធផលតេស្តនៅថ្ងៃដំបូងនោះគឺអវិជ្ជមានវីរុសកូវីដ-១៩ ហើយ​គាត់​ត្រូវ​បាន​បន្តធ្វើចត្តាឡីស័កស្នាក់នៅភូមិគ្រួស ឃុំស្វាយដង្គុំ ក្រុងសៀមរាប ខេត្តសៀមរាប។ លុះនៅថ្ងៃទី១៣ថ្ងៃនៃការធ្វើចត្តាឡីស័ក ត្រូវនឹងថ្ងៃទី២៥ ខែកញ្ញា ឆ្នាំ២០២០ បុរសជនជាតិហុងគ្រីរូបនោះ ក៏ត្រូវបានធ្វើតេស្តជាលើកទី២ឡើងវិញ ក្នុងថ្ងៃរង់ចាំស្រាប់តែក្រុមការងារសុខាភិបាលខេត្តសៀមរាប មិនអាចទាក់ទងជាមួយបុរសជនជាតិហុងគ្រីម្នាក់នោះបានឡើយ ហើយគាត់បានរត់គេច និងមិនបានឃើញគាត់នៅកន្លែងស្នាក់នៅតែម្ដង។ យ៉ាងណាក៏ដោយ បុរស​ជនជាតិហុងគ្រីរូបនេះ ត្រូវ​គេ​រកឃើញ​ស្នាក់​នៅ​វីឡាមួយ​កន្លែងក្នុង​សង្កាត់ស្វាយដង្គុំ។

បើ​តាមព័ត៌មានដែល​ក្រសួងទទួល​បាន បុរស​ហុងគ្រីរូបនេះ បាន​ចាកចេញពីភ្នំពេញ​នៅ​ថ្ងៃទី​១៦ ខែកញ្ញា ឆ្ពោះទៅសៀមរាប ដោយបានម៉ៅតាក់ស៊ីជិះមួយតែម្នាក់ឯង និងឈប់​ចាក់ប្រេង​តែម្តងគត់នៅតាមផ្លូវ។

ពេលទៅដល់សៀមរាប គាត់សម្ងំធ្វើការក្នុងផ្ទះ ដោយគាត់ជាបណ្ឌិត​វិទ្យាសាស្ត្រសេដ្ឋកិច្ច ដោយមានតែមួយថ្ងៃគត់​ គឺ​ថ្ងៃទី​១៧ ខែកញ្ញា គាត់បានចេញទៅទិញផ្ទាំងគំនួរដោយជិះកង់​បី នៅគ្រឹះស្ថាន​ក្រុងអង្គរ រួចត្រឡប់ទៅផ្ទះវិញ។

រីឯភរិយារបស់គាត់ដោយសារមានម្ហូបអាហារជាច្រើននៅក្នុងផ្ទះ ក៏មិន​បានចេញទៅណានោះដែរ តែបាន​ចេញទៅផ្សារម្តងគត់ ហើយបានអះអាងថា មិនបានប៉ះពាល់អ្នកផ្សេងឡើយ៕